kavibasha.blgospot.com

Post Top Ad

ശിവപ്രസാദ് പാലോട്

www.kavibasha.blogspot.com

Thursday, March 29, 2012

2:12 AM

ഹൈക്കു കവിതകൾ

മഴക്കുട്ടി

വേനല്‍ മേഘം
ആറ്റുനോറ്റിരുന്നു  
മഴയെ പെറ്റു,

മഴയെ കാത്തു

ഭൂമിയുടെ
അമ്മത്തൊട്ടില്‍

മേഘം ജലാശയത്തോട്

ചേര്‍ന്ന് വന്നു
മഴയെ മുലയൂട്ടി


www.kavibhasha.blogspot.com
2:05 AM

ഹൈക്കു കവിതകൾ

 
 കാഴ്ച
കണ്ണിനെനെക്കാള്‍
വലിയ കരടു പെട്ടു,
മാഞ്ഞു മഴവില്ല്
പിറവി
മണ്ണില്‍ വീഴണം
പുതു മഴ കൊള്ളണം
പടുമുളക്കണമെനിക്ക്
മഴ
ഭ്രാന്തന്‍ മഴ
കൂക്കിവിളിച്ചു
എങ്ങോട്ടോ ഓടിപ്പോയി
മേഘം
വേനല്‍ മേഘം
ആറ്റുനോറ്റിരുന്നു
മഴയെ പെറ്റു
അടൂപ്പ്
മനസ്സടുപ്പില്‍
വേവിചെടുത്തത്
പ്രണയച്ചോറ്

1:58 AM

കുറുങ്കവിതകൾ

പടുമുള

കാലംതെറ്റി
ആരാലും കാണാതെ ,
കാട്ടുചെടിയുടെ
പൂവാകണം,
വണ്ടില്‍ നിന്നും
പരാഗം വേണം ,
കായാകണം,
വേലിയും കാവലുമില്ലാതെ
മഴയും വെയിലുമേറ്റ്
മഞ്ഞച്ചു പഴുക്കണം ,
ഒരു കിളിക്ക്
തീറ്റക്കുള്ള
മധുരമാകണം ,
അവളിലൂടെ കടന്നു
മണ്ണില്‍ വീഴണം ,
ഉണങ്ങി കിടക്കണം
പുതു മഴ കൊള്ളണം
പടുമുളക്കണമെനിക്ക്

Monday, March 26, 2012

4:45 AM

ഹൈക്കു കവിതകൾ

























അശ്വമേധം 


കുളമ്പു തേഞ്ഞ
കുതിരക്കന്യമായി
രാജ വീഥി 

പിറവി 


അമച്ചു പൊട്ടി
കുറ്റിയില്‍ നിന്നുമൊരു
ഓമലിതള്‍ 

മറവി 
ഗാനം മറന്നു
വിതുമ്പിപ്പോയി
ഓടക്കുഴല്‍ 


ഒടുക്കം 
കറവ വറ്റി 
കയറിട്ടു വലിക്കുന്നു
അറവു കത്തി 


മോക്ഷം 
കാളിയന്‍ പോലും
തെല്ലിട മയങ്ങി
വേണുഗാനത്തില്‍ 




Sunday, March 25, 2012

7:55 PM

ഹൈക്കു കവിതകൾ

കുഞ്ഞിക്കവിതകള്‍ 
































യാമം 
പരിഭവിച്ച
ഇരുട്ടിനെ ത്തേടി
നിലാവിറക്കം



തമ്മില്‍ 
ഇരുമ്പില്‍ നിന്നുമൊളിച്ചോടി
ആകര്‍ഷണം
നഷ്ടപ്പെട്ട കാന്തം

പ്രായം 
വാര്‍ധക്യം
കൌമാരയൌവനങ്ങള്‍
ചവച്ചു തുപ്പി



അകാലം 
തട്ടിപ്പോയ 
ചായപ്പാത്രത്തിലലസി
പിഞ്ചുചിത്രം


7:43 PM

ഹൈക്കു കവിതകൾ


ഹെക്കു കവിതകള്‍ 






ഉടുപ്പ്



പൊഴിച്ച പടം
നോക്കാതിഴഞ്ഞു പോയി
കാല സര്‍പം


ആല
കൊല്ലന്‍രാകുന്നു 

ആലക്കുള്ളിലിരുന്നു
ജീവിതമൂര്‍ച്ചകള്‍





രാത്രി 
കിനാവുണ്ട് ,
നിലാവ് കുടിച്ചു,
രാത്രി ചീര്‍ത്തു



വീട്


തീ പിടിച്ച വീട്
പാതി വെന്ത സ്വപനം
ഇറങ്ങിയോടി



നാം 
നാം പരസ്പരം
പോരടിക്കുംമ്പോഴും
നിഴലുകളാലിംഗനത്തില്‍

ചക്രം


ഊരിത്തെറിച്ച ചക്രം
വേഗങ്ങള്‍ അഴിച്ചു വച്ച്
നിശ്ചലം വീഥിയില്‍






Saturday, March 24, 2012

7:45 AM

ഹൈക്കു കവിതകൾ

ശ്മശാനം 
കല്ലറയില്‍പൂ വയ്ക്കാൻ
വന്ന കാമുകിയെ
കടാക്ഷിച്ചു ആത്മാവ്
 


ദൈന്യം 
കരിഞ്ഞു കിടക്കുന്നു
മുടീയിലിന്നലെ ചൂടീച്ച
ചെമ്പനിനീര്‍ ,ദൈന്യം
 

മൌനം 

പൊയ്മുഖങ്ങളുടെ
മൌന പ്രാര്‍ഥനക്കിടയില്‍
അശാന്തമാത്മാവ്


അവധി 
പങ്കിടലുകളുടെ
മാവിന്‍ ചുവട്ടിലിനി
വേനലവധി
 

പോക്ക് 
ശലഭം വന്നു
വിളിച്ചപ്പോൾ
പൂവു കൂടെപ്പോയി





7:38 AM

ഹൈക്കു കവിതകൾ

ധ്വനി 

ഊതി നോക്കവേ
ഉടഞ്ഞു പോയെന്റെ
ജീവിത ശംഖ്

ഞാന്‍

സഹിക്കവയ്യ,
തിരസ്കാരം
അസ്തമിക്കട്ടെ ഞാന്‍

പകല്‍
രാത്രിയിലെവിടെയോക്കെയോ
അലഞ്ഞു തിരിഞ്ഞു
വന്നിരിക്കുകയാണ്, പകല്‍

വിരഹം 

വിരഹത്തിന്റെ പുസ്തകം
വായിക്കാന്‍ തന്ന്
യാത്രയാവുന്നു സൌഹൃദം
 

Friday, March 16, 2012

5:58 AM

കുറുങ്കവിതകൾ

കണ്ണാടി
കണ്ണാടി നോക്കവേ
സന്ദേഹം ,ബിംബമോ
പ്രതി ബിംബമോ ഞാന്‍ 


ഓട
ഓട വെള്ളത്തില്‍
പല്ലിളിച്ചു കാണിക്കുന്നു
ദരിദ്രസൂര്യന്‍



ജീവിതം 
ഉള്ളടക്കം
പൊട്ടിയൊലിച്ച
ജീവിതപുസ്തകം
വായിച്ചു മടുത്തുഞാന്‍


മരണമൊഴി 
വീട്ടില്‍
പൂജാമുറിക്കടുത്ത്
മേല്‍ക്കൂരയിലെ കൊളുത്തും
കുട്ടിക്ക് തൊട്ടില്‍ കെട്ടി
ബാക്കി വന്ന
നൈലോണ്‍ കയറും
വല്ലാതെ പ്രലോഭിപ്പിക്കുന്നു
ഇപ്പോളെപ്പോഴും


അഹല്യ
ശിലകളനേകം
ഏതാണഹല്യെ
നീയോളിച്ചിരിക്കും
ശിലയതു
തിരഞ്ഞലയുന്നു ഞാന്‍
5:49 AM

അലക്ക്

അലക്ക് 

അലക്കുകല്ലില്‍
തലതല്ലി മരിക്കുന്നു ,
മുഷിഞ്ഞ സൗഹൃദം.

ഉടഞ്ഞു പോകുന്നു
കറ പുരണ്ട ഹൃദയം,
വെളുത്തു ജീവിതം .

വരുന്നതെല്ലാം
വെളുപ്പിച്ചു വിടുമ്പോഴും,
അലക്കുകല്ലും
അലക്കും കൈകളും,
കറുത്തുതന്നെ,
കറുത്തുതന്നെ ..
.

Saturday, March 10, 2012

7:39 PM

ചാവുകവിതകള്‍

ചാവുകവിതകള്‍ 

ശവം


പുഷ്പചക്രങ്ങള്‍ 
ചുമന്നു വിയര്‍ത്തു
 
പാവം ശവം

ശ്മശാനം
ശ്മശാനത്തില്‍
പൂത്തു നില്‍ക്കുന്നു
മല്ലിക പൂക്കള്‍

ഒടുക്കം 
കയ്ച്ചുകിടക്കുമ്പോള്‍
ഉറുമ്പുകള്‍ മധുരത്തോടെ
വന്നു പൊതിയും
സ്വകാര്യം 
വട്ടമിട്ട വണ്ട്‌
പൂവിനോട് പറഞ്ഞത്
മരണത്തെ പറ്റിയായിരുന്നു 

കലണ്ടര്‍ 
ചത്തുകിടന്ന
അക്കങ്ങളെ അടക്കിയ
തെമ്മാടിക്കുഴി 

നന്ദി 
ജീവിതത്തെ പറ്റി
എപ്പോഴും ഓര്‍മിപ്പിക്കുന്ന
മരണത്തിനോടും 
മരണത്തെ പറ്റി
ഇപ്പോഴും ഓര്‍മിപ്പിച്ച

ജീവിതത്തോടും












7:07 PM

ഹൈക്കു കവിതകൾ

കുഞ്ഞുകവിതകള്‍ 


ഉറവ 


ചിന്ത കയറിയ
കാട്ടില്‍ നിന്നുമിറങ്ങി
ഭ്രാന്തിപ്പുഴ




ഗാന്ധി


കീശയിലുണ്ട്
ഗാന്ധി
മനസ്സിലില്ല
ഗാന്ധി



വേവ്


പകലടുപ്പ്
വെന്തെരിഞ്ഞു തീര്‍ന്നു
രാത്രിമുറ്റത്ത്



മംഗല്യം 


പകലിന്റെ ചങ്കില്‍
കൊടുംവിഷമൊഴിച്ചു
സന്ധ്യ സുമംഗലിയായി 



ഹോളി


ചായക്കൂട്ടുകള്‍
കലങ്ങി മറിഞ്ഞു
പൊയ്മുഖങ്ങള്‍



വിശപ്പ്‌


ഉച്ച ബെല്ലടീച്ചു
ഒളിച്ചുവച്ചവിഃശപ്പ്
കുതറീയോടീ 








Tuesday, March 6, 2012

8:25 PM

പിറവികൾ

പിറവികള്‍ 


ചില കവിതകള്‍
ജന്മനാ വൈകല്യത്തോടെ
പിറന്നെന്നിരിക്കും ,

ആറ്റു നോറ്റുണ്ടായത്
ഉപേക്ഷിക്ക വയ്യ ..
കണ്ണെഴുതിയും,
പൊട്ടു തോടുവിച്ചും
വളര്‍ത്തുക തന്നെ ചെയ്യും ..

പറ്റുമെങ്കില്‍ ചികിത്സിക്കും
മരുന്നും മന്ത്രവുമായി ,
എടുത്തു മാറ്റിയും
കൂട്ടിച്ചേര്‍ത്തും ,
ശസ്ത്രക്രിയ നടത്തും

ആര് കളിയാക്കിയാലും,
പുളിച്ച സഹതാപം കൊണ്ട്
മൂടിയാലും ,
പോകുന്നെടതൊക്കെ
കൊണ്ടുപോകും ,
കല്യാണ വീട്ടിലും,
ഉത്സവത്തിനും,
കടപ്പുറത്തും,
ജാഥക്കും,സമരത്തിനും
മരണ വീട്ടിലും
ഒക്കത്തൊരു കവിതയുമായി ..

പിച്ചക്കിരുത്തുക വയ്യ
അത് കൊണ്ടുതന്നെ
ആരും കണ്ടില്ലെങ്കിലും
കേട്ടില്ലെന്കിലും
പരാതിയൊട്ടുമില്ല

ചില കവിതകള്‍
ജന്മനാ വൈകല്യത്തോടെ
പിറന്നെന്നിരിക്കും ,
8:13 PM

ഹെക്കു കവിതകള്‍

ഹെക്കു കവിതകള്‍ 


കിണര്‍

മലര്‍ന്നു കിടന്നു
ആകാശം കുടിച്ചു വറ്റിച്ചു
ഭ്രാന്തന്‍ കിണര്‍

കാലം 

കശാപ്പുശാലക്ക്
അയവെട്ടിപ്പോകുന്നു
വൃദ്ധ ഋഷഭം

വിധി 
തന്തക്കാള
വയസ്സനറവുകാരന്‍
രാകിത്തേഞ്ഞ കത്തി


പ്രേമം 
ചുംബിച്ചു പോയി
വിടര്‍ത്തിയ പത്തിയില്‍ ,
ദംശിക്ക വേഗം

ബാല്യം

സ്കൂള്‍വിട്ടു
തുലാത്തുമ്പികള്‍
ചിതറീപ്പറന്നു 


ജന്മം 
ഐസ് പെട്ടിയില്‍
വെറുങ്ങലിചിരിക്കുന്നു
മീന്‍ കിനാവുകള്‍

Thursday, March 1, 2012

7:43 AM

കുറുങ്കവിതകൾ

എനിക്ക് 
=====
എന്റെ പൂവാടി നീയെടുക്കൂ
എന്റെ പൂമ്പാറ്റകളെ നീയെടുക്കൂ
എന്റെ വസന്തം നീയെടുക്കൂ
നിന്നെ മാത്രം എനിക്ക് തരൂ 



ഞാനും നീയും 


എന്റെ ജീവിതത്തിനു
മരണം ഞാന്‍ ,
ജീവന്‍ നീ .

എന്റെ സ്വപ്നത്തില്‍ 
നിലവിളി ഞാന്‍ ,
ഉണര്‍ച്ച നീ .

എന്റെ ദാഹത്തിന്,
എനെ വിശപ്പിന് ,
എന്റെ കാമത്തിന്,
ഇര നീ,
ചൂണ്ട ഞാന്‍ ,

എന്റെ ചിതക്ക്
വിറകു ഞാന്‍ ,
തീ നീ.

എന്റെ ഓര്‍മയ്ക്ക്
ബലി ഞാന്‍ ,
മറവി നീ.