Tuesday, November 20, 2012

ഉറക്കം 

ഒരേ പോലത്തെ 

കുപ്പികളില്‍ 
അവര്‍ 
വിവിധ നിറത്തിലുള്ള
ചോരകള്‍
പ്രദര്‍ശനത്തിന്
വച്ചിരിക്കുന്നു
പല പ്രദേശത്തുനിന്നുള്ളവ
പല സംസ്കാരത്തില്‍
പല പ്രായത്തിലുള്ളവ

അതിനിടയിലൂടെ
നഗ്നമായ
വാക്കുകളോടെ
ഒരാള്‍ ഓടിനടന്നു പുലമ്പുന്നു

ചോരക്കു നിറം ചുകപ്പ്
ചോരക്കു നിറം ചുകപ്പ്

ഒരു വെടിയൊച്ചയും
പുകമറയും,
ചുകന്ന
പരവതാനിയില്‍
കമിഴ്ന്നു കിടക്കുന്നു അയാള്‍

സ്വപ്നം
പാതിയില്‍ മുറിഞ്ഞു
ഞെട്ടിയുണര്‍ന്നു
നോക്കുമ്പോള്‍
ജനാലച്ചതുരത്തിനപ്പുറം
ഒട്ടും പരിചിതമല്ലാത്ത
ആകാശത്ത്
ഒരു വിമാനം
ചൂട്ടും മിന്നി
കനത്ത ഒരു മൂളല്‍ മൂളി
കടന്നു പോകുന്നു

നൂറ്റാണ്ടുകളുടെ
ഭീര്‍ുത്വത്തിന്റെ
കരിമ്പടം തലവഴി മൂടി
പേടിയുടെ തണുത്ത കൈകള്‍
കാലിടയില്‍ തിരുകി വച്ചു
ഗുഹയില്‍
പിന്നെയും ഉറങ്ങാന്‍ കിടന്നു
വിശ്വമാനവന്‍ 

No comments:

Post a Comment