-
കൂടെപ്പോരാന്‍
കാറ്റ്
മരത്തെ
കുറെ വിളിച്ചതായിരുന്നു
ഒറ്റയ്ക്ക് നിക്കുന്നത്
ഇക്കാലത്ത്
നന്നല്ലെന്നും
അങ്ങ് ദൂരെ
ഒരു മഴക്കാടുണ്ടെന്നും
അവിടെയെവിടെയെങ്കിലും
ഒരിടം ഉണ്ടാക്കി തരാമെന്നും
കാറ്റിനൊപ്പം പറന്ന
അപ്പൂപ്പന്താടിയും
മരത്തോട് പറഞ്ഞിരുന്നു
മരം പറഞ്ഞു :
ഞാന്‍ പോയാല്‍
എന്റെ മണ്ണിനു ആരുണ്ട്‌
വേരുകളുടെ
കൂട്ടില്ലാതെ ?
മഴ വന്നു
മഞ്ഞു വന്നു
വെയില്‍ വന്നു
വിളിക്കുമ്പോള്‍
കിളി വന്നു
നിഴല്‍ വന്നു
നിലാവ് വന്നു
പൂ വന്നു
കായ്‌ വന്നു
പൂമ്പാറ്റ വന്നു
ഊഞ്ഞാലുകള്‍ വന്നു
പുഞ്ചിരികള്‍ വന്നു
വിളിക്കുമ്പോള്‍
എനിക്ക് കൂടെ കളിക്കണം ..
അവരെ ഊട്ടണം
ഞാനില്ല ...
മരം പിന്നെയും
വേരുകൊണ്ട്
മണ്ണിനെ ഇറുകെ പുണര്‍ന്നു
ഇലകള്‍ കൊണ്ട്
ആകാശത്തെ ഉമ്മ വച്ചു
പൂക്കള്‍ കൊണ്ട്
മഴവില്ലുകളെ തലോടി
അങ്ങിനെ ഒരേ നില്‍പ്പ്
No comments:
Post a Comment