ചിറക്

ചിറക്

ഒരു ദിവസം 
അരുമയോടെ 
നീ എന്നെ എടുത്തു 
തൂവലുകളില്‍ തലോടും 
കൊക്കില്‍ ഉമ്മ വച്ചു 
കൊഞ്ചിക്കും

ഒളിപ്പിച്ചു വച്ച കത്രിക 
എന്നെ പേടിപ്പിക്കാതെ
നീ എടുക്കും
എനിക്കേറ്റവും ഇഷ്ടപ്പെട്ട
ആ പഴം തരും
തലോടിക്കൊണ്ട് തന്നെ
അത്രമേല്‍ പതുക്കെ
സ്നേഹത്തോടെ
ഒരിറ്റു പോലും വേദനിപ്പിക്കാതെ
എന്റെ ചിറകുകള്‍
നീ അരിയും

പിന്നെ നീ എനിക്ക്
അപാരമായ
സ്വാതന്ത്ര്യം വിളമ്പിത്തരും
എനിക്ക് എവിടെ
വേണമെങ്കിലും പോകാം
ഏതു ചില്ലയിലും ചേക്കേറാം,

ഇതൊക്കെ അറിയാവുന്നത് കൊണ്ട്
ഞാന്‍ എന്നേ
എന്റെ ആകാശത്തിനു
അതിരിട്ടിരുന്നു
എന്റെ ചിറകുകള്‍
എന്നേ മരിച്ചിരുന്നു ..