kavibasha.blgospot.com

Post Top Ad

ശിവപ്രസാദ് പാലോട്

www.kavibasha.blogspot.com

Saturday, November 30, 2013

8:09 PM

ഒറ്റവരി കവിതകള്‍

ഒറ്റവരി കവിതകള്‍ 

*കാക്ക കുളിച്ചുണ്ടായ കൊക്കുകളാണ് പാടം നിറയെ


*ചൂണ്ടക്കൊളുത്തില്‍ പിടയുന്നുണ്ട് ഒരിര,ഞാന്‍ പോയി കൊത്തട്ടെ ?
*നീ എനിക്ക് ബലിയിടരുത്

*കിനാവുകള്‍ക്ക് മീതെ ജീവിതലാവ

*ഇന്ന് ആണ് നാളെ ഇന്നലെ ആകുന്നത്.

*ജീവിതം ഒരു വ്യവകലന പട്ടിക

*എനിക്ക് ഗതി കിട്ടാതെ അലയണം
7:51 PM

പൊട്ടും പൊടിയും

പൊട്ടും പൊടിയും 

ബാക്കി 
ഉദ്യാനം 
ആക്കിത്തരാം 
എന്ന് പറഞ്ഞിട്ടാണ് 
ജീവിതം അവള്‍ 
കയ്യേറ്റത്
ഇപ്പോള്‍ 
വെട്ടിയൊതുക്കി 
ബാക്കിയായതോ 
ഒരു മരുഭൂമി

കാലം 

ചിറകു വെട്ടിയ 
കാലമേ 
പിന്നെ നീ 
ഈ ആകാശം 
ബാക്കി വച്ച് 
കൊതിപ്പിക്കുന്നു

ഭാഗ്യം 

കൈനോക്കാന്‍ 
വന്നവന്‍ 
കുറത്തിയെയും 
കൊണ്ട് പോയി 
കൂട്ടിലെ തത്ത 
വിശന്നു ചത്തു

അത് കൊണ്ട് മാത്രം


വല്ലാത്ത 
കൊതിയായിരുന്നു 
എനിക്ക് നിന്നോട് 

അത് കൊണ്ടാണ് 
പിടിച്ചു 
ഉപ്പിലിട്ടു 
കളഞ്ഞത്
കൊത്തിയരിഞ്ഞു
അച്ചാര്‍ ആക്കിയത്
കത്തിക്ക് പൂളി
കടിച്ചു തിന്നത്
പിഴിഞ്ഞ്
കുപ്പിയിലാക്കിയത്
7:45 PM

വിശപ്പുകള്‍


വിശപ്പുകള്‍ 


കൈനോക്കാന്‍ 
വന്നവന്റെ 
ചിതല്‍ തിരയുമ്പോളും,
ചുളുങ്ങിക്കിടന്ന 
പോക്കറ്റിലായിരുന്നു 
കുറത്തിയുടെ കണ്ണ്

കൈനോക്കുന്ന 
കുറത്തിയുടെ
ഇടം മാറിയ
വിയര്‍പ്പു തുണിയിലായിരുന്നു
അവന്റെ കണ്ണ്

കൂടിനു പുറത്ത്
ആരോ കൊറിച്ചിട്ടുപോയ
കടലത്തോടിലും
ഒരു തുണ്ട് ആകാശത്തിലും
തത്തയുടെ കണ്ണ്

തിമിരത്തിന്റെ
മൂടലിലും
ഇതെല്ലാം തിരയുകയായിരുന്നു
എന്റെ പൊട്ടക്കണ്ണ്

Saturday, November 23, 2013

6:54 AM

ഉദ്യാനം





ഉദ്യാനം


ഓരോ പൂവിനും 
ദംഷ്ട്രകള്‍ 
ഉള്ളത് പോലെ 

നിണമിറ്റുന്ന
ചോരനാവുള്ളത് പോലെ 

ദളവിതളങ്ങളില്‍
അരൂപിയായൊരു ഫണം
കാറ്റിലാടുന്ന പോലെ

പരാഗങ്ങളില്‍
നഞ്ഞു പേറുന്ന പോലെ

പച്ചപ്പുകളില്‍
ഒളിഞ്ഞിരിക്കുന്ന
തുറുകണ്ണു പോലെ

ഞെട്ടുകളില്‍
ഒരു സ്വപ്നം
ചാപിള്ള പോലെ

യുദ്ധഭൂമിയുടെ
മണം പരക്കുന്ന പോലെ

വിജനമായൊരു
നിലവിളിയില്‍
പൂക്കള്‍ സംഘംചേര്‍ന്ന്
ഒരു പൂമ്പാറ്റയെ
കടിച്ചു പറിച്ചു
പങ്കിടുന്ന പോലെ

പൂക്കളെ കാണുമ്പോള്‍
ഇപ്പോള്‍ ഭയമാണ്


6:52 AM

മറക്കാന്‍






മറക്കാന്‍ 

മറക്കണം എന്നുണ്ട് 
പക്ഷെ 

വെള്ളം കാണുമ്പോള്‍ 
ഓര്‍മ വരും 
പുഴയോരത്ത് 
നാമെത്ര ഒഴുകിയിട്ടുണ്ട് 

കാറ്റടിച്ചാല്‍
ഓര്‍മവരും
പറത്തി വിട്ട പട്ടങ്ങള്‍

ചുരം കയറുമ്പോള്‍
ഓര്‍മവരും
വേവലാതിയുടെ പകലുകള്‍

മൂടല്‍ മഞ്ഞു കാണുമ്പോള്‍
പൊതിഞ്ഞു നിന്ന
കിനാവുകള്‍

വിശപ്പ്‌ വരുമ്പോള്‍
ഓര്‍മവരും
വിശപ്പറിയാതെ
നാം നടന്ന ഉച്ചകള്‍

മഴ കാണുമ്പോള്‍
ഓര്‍മവരും
ചേര്‍ന്ന് നിന്ന ഒറ്റക്കുട

കടലു കാണുമ്പോള്‍
പിടഞ്ഞു വരുന്നു
ആ കണ്ണിലെ തിര

അതുകൊണ്ട്
മറക്കാതെ
മറക്കാതെ
തീ തിന്നിങ്ങിനെ ..


6:49 AM

ശിക്ഷകള്‍




ശിക്ഷകള്‍


ഞാന്‍ നാടുകടത്തപ്പെടുകയാണ് 

കൂട്ടിച്ചേര്‍ക്കലുകളില്‍ 
പിരിച്ചു വയ്ക്കലിലേക്ക്

ഓര്‍മപ്പെടുത്തലുകളില്‍ നിന്നും 
മറവികളിലേക്ക് 

വാക്കുകളുടെ പൂക്കളില്‍ നിന്നും 
മൗനത്തിന്റെ മുള്ളുകളിലേക്ക് 

മുഖത്തില്‍ നിന്നും
പേപിടിച്ച
മുഖംമൂടികളിലേക്ക്

തണലുകളുടെ ഇടവേളകളില്‍ നിന്നും
മരുഭൂമികളിലേക്ക്
മരീചികയിലേക്ക്

വിഷം തീണ്ടിയ പാതകളിലേക്ക്
തീ തുപ്പുന്ന തെരുവുകളിലേക്ക്
വേട്ടനായ്ക്കളുടെ കുരകളിലേക്ക്

നിലവിളിയുടെ ഉച്ചസ്ഥായിയില്‍ തുടങ്ങി
പിടച്ചിലായി
നേര്‍ത്ത് നേര്‍ത്തു
ഒരു ഗോത്രഗാനം പോലെ
ഒടുങ്ങുന്ന ഇരയിലേക്ക് ..

ഒരു ദയാഹര്‍ജിക്കും
ഒഴിവാക്കാന്‍ കഴിയാത്ത
ആ കപ്പല്‍ അഴിമുഖത്ത് വന്ന്
നില്‍ക്കാന്‍ തുടങ്ങി നേരമേറെയായി

എന്റെ ഭാഷയില്‍ ഇനി പേച്ചില്ല
ലിപി മറക്കണം
ചുവടുമറക്കണം

ഞാന്‍ നാടുകടത്തപ്പെടാന്‍ പോകുകയാണ്


6:44 AM

ഉദ്യാനം






ഉദ്യാനം 

ഓരോ പൂവിനും 
ദംഷ്ട്രകള്‍ 
ഉള്ളത് പോലെ 

നിണമിറ്റുന്ന
ചോരനാവുള്ളത് പോലെ 

ദളവിതളങ്ങളില്‍
അരൂപിയായൊരു ഫണം
കാറ്റിലാടുന്ന പോലെ

പരാഗങ്ങളില്‍
നഞ്ഞു പേറുന്ന പോലെ

പച്ചപ്പുകളില്‍
ഒളിഞ്ഞിരിക്കുന്ന
തുറുകണ്ണു പോലെ

ഞെട്ടുകളില്‍
ഒരു സ്വപ്നം
ചാപിള്ള പോലെ

യുദ്ധഭൂമിയുടെ
മണം പരക്കുന്ന പോലെ

വിജനമായൊരു
നിലവിളിയില്‍
പൂക്കള്‍ സംഘംചേര്‍ന്ന്
ഒരു പൂമ്പാറ്റയെ
കടിച്ചു പറിച്ചു
പങ്കിടുന്ന പോലെ

പൂക്കളെ കാണുമ്പോള്‍
ഇപ്പോള്‍ ഭയമാണ്


6:42 AM

ഇനിയൊരിക്കലും


ഇനിയൊരിക്കലും


ഇനിയൊരിക്കലും 
പിഞ്ഞിത്തുടങ്ങിയ 
ഹൃദയവുമായി ഞാന്‍ 
നിന്റെ അടുക്കല്‍ വരില്ല 

ഇനിയൊരിക്കലും 
പൊട്ടിപ്പോയ മഴവില്ലുകളെ 
ചേര്‍ത്ത് വയ്ക്കാന്‍ നോക്കി 
നിന്നരികിലെത്തില്ല

ഇനിയൊരിക്കലും
കലങ്ങിയ കണ്ണുകളുമായോ
ഇടറിയ ചങ്കുമായോ
മഷി പടര്‍ന്നു പോയ
കുറിപ്പുകളുമായോ
ഞാനാ വഴിയിലെത്തില്ല

ഇനിയൊരിക്കലും
കാത്തുനില്പില്ല ,
പിന്‍വിളി ഇല്ല ,

ചത്തുപോയ നിന്റെ കണ്ണുകളില്‍
എനിക്കെന്റെ പ്രതിബിംബം
കാണാനാകാത്തതിനാല്‍

മരവിച്ച വാക്കുകളില്‍
എനിക്കൊന്നും
കേള്‍ക്കാനില്ലാത്തതിനാല്‍

നമ്മുടെ എല്ലാ പതാകകളും
പകുതിയില്‍ താഴ്ത്തിക്കെട്ടി
ഞാന്‍ മടങ്ങുകയാണ് ..
എന്നിലേക്ക് തന്നെ .


6:37 AM

ആഴ്ചവട്ടം

ആഴ്ചവട്ടം 

തിങ്കളാഴ്ച 
ഓന്റെ ഹര്‍ത്താല്‍ 
അത് നമ്മക്ക് പൊളിച്ചടുക്കണം 
എല്ലാ പീടികേം തൊറപ്പിക്കണം
എല്ലാ വണ്ടീം ഓടണം ..
ഓന്റെ പ്രകടനത്തിന്
കല്ലെറിയണം ,
ഓന്റെ ആട്ടിന്‍ തോലിട്ടു
നമ്മടെ പിള്ളേര്‍ കൂട്ടത്തില്‍ കയറണം
ഓന്റെ നേതാക്കന്മാരെ കണ്ടാല്‍ ,
കാക്കിക്കാരെ കണ്ടാല്‍ ,
അപ്പൊ മുതലാക്കണം .

കുടുങ്ങിപ്പോയ ഏതെന്കിലും
വയസ്സനെയോ വയസ്സത്തിയെയോ കിട്ടിയാല്‍
ഒക്കത്തെടുത്ത് വേണ്ടിടത്ത്
എത്തിക്കാന്‍ നമ്മടെ പിള്ളേരോട് പറയണം
അതൊരു മൈലേജാ ..

മിന്നല്‍ ഹര്‍ത്താലിനെതിരെ
ഇന്നെന്നെ പ്രസ്താവന
കൊടുക്കണം
ഓന്റെ ഒരു ഹര്‍ത്താല്‍ ..
ഓനതിനൊക്കെ വളര്‍ന്നോ ?

ചൊവ്വാഴ്ച
നമ്മടെ ഹര്‍ത്താല്‍
അത് അടിപോളിയാക്കണം
കൊടിയെക്കാള്‍ വലിയ
വടികള്‍ ഇന്നെന്നെ വെട്ടണം
രാത്രി തന്നെ റോഡോക്കെ
ബ്ലോക്കാക്കണം
പെട്ടിക്കട പോലും
ബസ്‌ സ്റ്റാന്റിലെ
മൂത്രപ്പുര പോലും
തുറക്കരുത്
സൈക്കിള്‍ പോലും ഓടരുത്
കോളേജിന്റെ മുമ്പില്‍ ഒരു
പ്രകടനം ആയിക്കോട്ടെ
നമ്മടെ ചെക്കന്മാര്‍ക്ക്
ഒരു നേരമ്പോക്കിനു വക കിട്ടട്ടെ

പ്രസവത്തിനു കൊണ്ട് പോകുന്ന
ഓട്ടോ കണ്ടാല്‍ വിടണ്ട
കുത്തി പഞ്ചര്‍ ആക്കണം
വാര്‍ത്തക്കാര്‍ക്ക്
നല്ല ഡിമാന്റ് ആണത്

കൂട്ടത്തില്‍ നമ്മടെ ആഫിസിനും
സ്തൂപത്തിനും ,
വലിയ കേടില്ലാതെ
രണ്ടു ഏറു എറിയണം

ചിലപ്പോള്‍
ബുധനും വ്യാഴവും
വീണു കിട്ടിയാലോ ..

വെള്ളിയാഴ്ച കേരള ബന്ധ്
മറ്റവര്‍ പ്രഖ്യാപിച്ചിട്ടുണ്ട്
ശനിയാഴ്ച കരിദിനം
ഈര്‍ക്കില്‍ പാര്‍ട്ടിക്കാരും

ഞായറാഴ്ച പതിവ് പോലെ
നമുക്കൊന്ന് കൂടണം
ഓനെ ഇപ്പോള്‍ തന്നെ
വിളിച്ചു ഉറപ്പിക്കണം
സര്‍വ കക്ഷി സാമാധാന
സമ്മേളനത്തിന്..

Monday, November 18, 2013

3:08 AM

 പാലക്കാട്‌ ജില്ലാ ശാസ്ത്രമേള ദൃശ്യങ്ങള്‍ 


എയരോബിക്‌ സീഡ്‌ ഡ്രം ഉപകരണത്തിന്റെ മാതൃകയുമായി വാണിയംകുളം ടി ആര്‍ കെ ഹൈസ്കൂള്‍ വിദ്യാതികലായ വിദ്യ ,നവ്യ എന്നിവര്‍  


മുളപ്പിച്ച അരി കൊണ്ടുണ്ടാക്കിയ വിഭവങ്ങളുമായി പ്രോജക്റ്റ്‌ അവതരിപ്പിച്ച കുണ്ടൂര്‍ക്കുന്നു വി പി എ യു പി സ്കൂളിലെ ശിഫാന ,ജിതിന്‍ എന്നിവര്‍ 
വൈദ്യതി ഉള്പാടന്ത്തിനു കൊണ്ക്രീറ്റ്‌ ബാള്‍ സാങ്കേതിക വിദ്യയുമായി പാലക്കാട്‌ മോയന്‍ സ്കൂള്‍ വിദ്യാര്തികളായ സൂര്യ കൃഷ്ണ ,ആര്യ എന്നിവര്‍ 
ലംബ ദിശയിലുള്ള ഇതളുകള്‍ പിടിപ്പിച്ച നവീന കാറ്റാടി യന്ത്രവുമായി കുന്ദൂര്‍ക്കുന്നു വിപി എ യു പി സ്കൂളിലെ ശ്വേത ,ഹൃദ്യ എന്നിവര്‍ 
പാഴായ ടയര്‍ പ്ളാസ്റിക് എന്നിവര്യില്‍ നിന്നും ഇന്ധനങ്ങള്‍ നിര്‍മിക്കുന്ന മാതൃകയുമായി കുന്ദൂര്‍ക്കുന്നു വിപി എ യു പി സ്കൂളിലെ ശില്പ, നവ്യ ഉണ്ണിമേനോന്‍ എന്നിവര്‍ 

മൊബൈല്‍ ഫോണ്‍ ഉപയോഗിച്ച് വീട്ടിലെ വൈദ്യുത ഉപകരണങ്ങള്‍ നിയന്ത്രിക്കുന്ന മാതുകയുമായി ചെങ്ങനിയൂര്‍ എ യു പി സ്കൂളിലെ ആര്‍ദ്ര ഹരിദാസ്‌ ,അനുഷ എന്നിവര്‍
       


ഇ ടോയിലെറ്റ്‌ എന്ന ആശയവുമായി പള്ളിക്കുറുപ്പ് ശബരി സ്കൂള്‍ വിടയാര്തികലായ ശീതള്‍ രാമദാസ്‌ ,ശ്രീദേവ് എന്നിവര്‍

Sunday, November 17, 2013

5:57 AM

ഒറ്റവരി കവിതകള്‍



ഒറ്റവരി 

കവിതകള്‍ 


*നരകത്തിലുമുണ്ട് കട്ടുറുമ്പുകള്‍

*പൊതുദര്‍ശനത്തിനു വച്ചിടത്ത് നിന്നും ഇറങ്ങിപ്പോന്നു

*വെളിച്ചത്തു തട്ടിത്തടഞ്ഞു നടക്കുകയാണ് ഇരുട്ട്

*നമ്മളൊക്കെ മനുഷ്യന്റെ ലാര്‍വ

*നിന്റെ നോട്ടമെന്തിങ്ങിനെ അപരിചിതമായി ?

*മുഖം മറന്നുപോയ മുഖംമൂടികള്‍ നീയും ഞാനും

Saturday, November 16, 2013

7:40 AM

വയ്യാവേലികള്‍

വയ്യാവേലികള്‍ 




വ്യാ കാരണം 
-
മാഷ്‌ 
ക്ലാസ്സില്‍ 
അശ്ലീലം പറഞ്ഞത്രേ 

അവളുടെ 
പുല്ലിംഗം 
ചോദിച്ചത്രേ 
അവന്റെ സ്ത്രീലിംഗം 
ചോദിച്ചത്രേ ..



ചൊല്ല് 

ശക്തമായ 
കാറ്റും മഴയും കണ്ടപ്പോള്‍ 
മണ്ണാങ്കട്ടക്കും 
കരിയിലക്കും 
ആ വിഖ്യാതമായ 
കാശിയാത്ര 
മാറ്റി വച്ചാല്‍ 
മതിയായിരുന്നില്ലേ ?

ഇതിപ്പോള്‍ വെറുതെ
ഒരു ചോല്ലുണ്ടാക്കാന്‍ വേണ്ടി ..


കോഴി 

ഉണ്ടായിരുന്ന
കോഴി
വസന്തപിടിച്ചു ചത്തു
വേറൊന്നിനെ വളര്‍ത്തണം
അല്ലെന്കിലെങ്ങിനെ
സൂര്യന്‍ ഉദിക്കും ?




7:36 AM

വാക്കിന്‍ മണം

വാക്കിന്‍ മണം 

പാടത്ത് നിന്നും 
കേറിവന്ന 
ശങ്കരെട്ടന്റെ കയര്‍ക്കലിനു 
ചേറിന്റെ മണമുണ്ടായിരുന്നു 

ഷാപ്പിറങ്ങി വന്ന 
കണാരെട്ടന്റെ പാട്ടിനു 
കള്ളിന്റെ മണം

കുംബാരറെ പേച്ചിനു
കുഴഞ്ഞ മണ്ണിന്റെ മണം
കുറവന്റെ നാവെറിനു
വെറ്റില മണം
കുഴമ്പിന്റെ മണമുള്ള
പഴഞ്ചൊല്ലുകള്‍,
മഴച്ചാറലിനു
പുതുമണ്ണിന്‍ മണം

സഖാവേ
ഒന്നും മണക്കുന്നില്ലല്ലോ
മനം പിരട്ടുന്ന
നിന്റെ മൈതാന പ്രസംഗം
7:33 AM

എന്ത് പറയാന്‍ ?

എന്ത് പറയാന്‍ ?

എല്ലാ മനുഷ്യരും 
തലപോയ തെങ്ങുകളാണ് 
ചില കാലങ്ങളില്‍ ,

എല്ലാ തലപോയ തെങ്ങുകളിലും 
പക്ഷികള്‍ പൊത്തുകള്‍ ഉണ്ടാക്കാറുണ്ട് 
എല്ലാ പൊത്തുകളിലും
കൂടുകള്‍ ഉണ്ടാകാറുണ്ട് 
കൂട്ടുകളും ഉണ്ടാവാറുണ്ട്
സ്ഥിരമായും
അല്ലാതെയും

എല്ലാ കൂടുകളിലും
തങ്ങളുടെ കണ്ണെത്തണം
കാതെത്തണം
എന്ന് വിചാരിച്ചു
പിളര്‍ന്ന നാവും
ഫണവുമായി
ഇഴഞ്ഞു കയറുന്നവരോട്

അട മുട്ടകള്‍
പൊട്ടിക്കുന്നവരോട്
പിഞ്ചു മാംസം
രുചിക്കുന്നവരോട്
കണ്ണ് മിഴിയാത്ത കൌതുകങ്ങളെ
കൂട്ടിലാക്കുന്നവര്‍ക്ക്
ചിറകു വെട്ടി
പ്രദര്‍ശനത്തിനു വെയ്ക്കുന്നവരോട്
എന്ത് പറയാന്‍ ?
7:32 AM

കയ്പ്

കയ്പ്

മുലകുടി
അന്തമില്ലാതെ നീണ്ടപ്പോള്‍ 
അമ്മയാണ് ആദ്യം 
കയ്പിന്റെ രുചിയറിയിച്ചത്,

പിന്നെ അമ്മിഞ്ഞ കണ്ടാല്‍ 
അമ്മയെ കണ്ടാല്‍ 
ഒരു കയ്പ് 
പിറകോട്ടു വലിക്കും,

അമ്മ തന്നെയാണ്
വലതു കയ്യിലെ തള്ളവിരലില്‍
കയ്പ് പുരട്ടിയതും ,

വരമ്പില്‍ നിന്നും
യാത്ര പറയാതെ
നീ പറന്നു പോകുമ്പോള്‍
രാത്രിയുടെ ചേക്കില്ലത്തില്‍
ഞാന്‍ ഒറ്റക്കാകുമ്പോള്‍
തിരിച്ചു വരവില്ലാത്ത
ചിറകടികള്‍ക്ക്
കാതോര്‍ത്ത് മരിക്കുമ്പോള്‍ ,

എത്ര ശീലപ്പെട്ടു
മധുരിച്ചതും
മടുത്തു പോകാന്‍
ഇത്തിരി കയ്ച്ചാല്‍ മതി ,

ദേശാടനക്കിളീ..
നിന്നെയും കയ്ച്ചുപോകുന്നോ ?
നിനക്കെന്നെയും ?
7:31 AM

സ്വാഗതം

സ്വാഗതം 

കട്ടുറുമ്പുകളെ ,
നിങ്ങള്‍ക്ക് 
എപ്പോള്‍ വേണമെങ്കിലും 
എന്നെ കടിക്കാം 
നടന്ന് വന്നത് ,
നടക്കുന്നത് ഏറെയും 
കാട്ടുവഴികളിലൂടെയാണെന്നതിനാല്‍ 

കരിന്തേളുകളെ
നിങ്ങള്‍ക്ക്
എപ്പോള്‍ വേണം എങ്കിലും
എന്നെ കുത്താം
അതെപ്പോളും
കാത്തിരിക്കുന്നുണ്ട്
ചെരുപ്പൂരിവച്ച കാലുകള്‍

മണിയനീച്ചകളെ
കുനിയനുറുമ്പുകളെ
നിങ്ങള്‍ക്ക്
വേണ്ടത്
ഒരു ശവം ആകുമ്പോള്‍
ഞാന്‍ മണ്ണിനെ ഉമ്മവച്ചു
കിടക്കുന്നുണ്ട് ...
സ്വാഗതം
7:30 AM

വേട്ട

വേട്ട

ചില വേട്ടക്കാര്‍ 
കൊന്നാല്‍ 
കൊണ്ട് പോയി തിന്നും 
ഉച്ചിഷ്ടം വേട്ടനായ്ക്കള്‍ക്ക് ,
ദയാലുക്കള്‍ .

ചിലവര്‍ 
കൊണ്ട് നടന്നു 
പ്രദര്‍ശിപ്പിക്കും
കയ്യടി നേടും
ചത്തും ചാവാതെയും
ഇരയങ്ങിനെ...
ഭീരുക്കള്‍ .

ചിലവര്‍ പങ്കിടും
അതെനിക്ക്
ഇത് നിനക്ക് ..
സ്നേഹിതര്‍ .

ജീവനോടെ പിടിച്ചും
കൂട്ടിലിട്ടു മെരുക്കിയും
കെട്ടിയിട്ടു വളര്‍ത്തിയും
ചിറകൊടിച്ചും
ബന്ധുക്കള്‍
7:29 AM

ജാതകം

ജാതകം 

നിലക്കാത്ത 
ഒരൊഴുക്കു ആകുമെന്ന് കരുതി,
ഇടക്കെപ്പോഴോ 
വരണ്ടു പോയി 

ഒടുങ്ങാത്ത 
പെയ്ത്ത് ആകുമെന്ന് തോന്നി ,
പോടുന്നെനെ തോര്‍ന്നു 

മായാതെ
നില്‍ക്കും മാരിവില്ലെന്നു കരുതി
കൈയ്യേത്തിച്ചപ്പോളെ,
മാഞ്ഞും പോയി

പൂവിട്ടേ നില്‍ക്കുമെന്നു തോന്നി
കണ്ടു നിക്കവേ ,
കരിഞ്ഞും പോയി

എന്നും മൂടിക്കൊണ്ട്
കൂട്ടാകുമെന്നു കരുതി ,
യാത്ര പറയാതെ അലിഞ്ഞു പോയി

തിരയോഴിയാത്ത
കടലാകുമെന്നു തോന്നി,
ഉയിരറ്റ മൌനമായി

തളിരുറ്റ പച്ചപ്പാകുമെന്നു കരുതി
തണലാകുമെന്നു കരുതി ,
മരുഭൂവായി

എനിക്ക് തുഴഞ്ഞെത്താന്‍ പറ്റാത്ത
ഏതോ ദ്വീപ്
പറന്നെത്താന്‍ പറ്റാത്ത
ഏതേതോ ആകാശം
നിന്റെ ഒളിയിടം

പൊലിഞ്ഞു പോയ സ്വപ്നത്തിന്റെ
ജാതകം നോക്കി ,
ഓര്‍മയുടെ കനലുകളില്‍
നടന്നു നടന്ന്,
തിരശീല താഴും വരെ
എനിക്കിനി ഒരേ വേഷം .
7:16 AM

ഒരു നവംബര്‍ പതിനാലിന് അവനും അവളും

ഒരു നവംബര്‍ പതിനാലിന് 


അവനും അവളും 



അവന്‍ 
ചെണ്ട കൊട്ടിയപ്പോള്‍ 
അവള്‍
വലിച്ചു കെട്ടിയ കമ്പിയിലൂടെ
പിച്ച വച്ചു
അവള്‍ വിസിലടിച്ചപ്പോള്‍
അവന്‍
തീ വളയത്തിലൂടെ
ഊര്‍ന്നു ചാടി

അവനും അവളും
വയററ്ത്തടിച്ചും
തൊണ്ട പൊട്ടിച്ചും
ആള്‍ക്കൂട്ടത്തില്‍
പിച്ചക്കിറങ്ങി ,

അപ്പോള്‍ ശിശുദിനറാലി
റോഡിലൂടെ
കടന്നു പോകുകയായിരുന്നു

Saturday, November 9, 2013

5:50 AM

ദാമ്പത്യം

ദാമ്പത്യം 


വെള്ളത്തില്‍
ഒരു മീന്‍

ഞാന്‍ പറഞ്ഞു
മീന്‍ കളിക്കുകയാണെന്ന്
നീ പറഞ്ഞു
മീന്‍ ഇര തേടുകയാണെന്ന്

മീനിനെ
നോക്കി നില്‍ക്കാം
എന്ന് ഞാന്‍
കളയാന്‍ സമയമില്ലെന്ന് നീ

തര്‍ക്കമായി
തീരുമാനം ആകണ്ടേ

നമ്മള്‍ മീനിനെ പിടിച്ചു
കരയിലിട്ടു

ഞാന്‍ പറഞ്ഞു
മീന്‍ നൃത്തം ചെയ്യുകയാണെന്ന്
നീ പറഞ്ഞു
മീന്‍ പിടയുകയാണെന്ന്

ഞാന്‍ പറഞ്ഞു
മീന്‍ ആകാശത്തെ
വായില്‍ ഉള്‍ക്കൊള്ളുകയാണെന്ന്
നീ പറഞ്ഞു
മീനിനു ശ്വാസം മുട്ടുകയാണെന്ന്

ഞാന്‍ പറഞ്ഞു
മീന്‍ വിശ്രമിക്കുകയാണെന്ന്
നീ പറഞ്ഞു
മീന്‍ ചത്തു പോയെന്ന്

ഉറുമ്പുകള്‍ക്കും
കാക്കകള്‍ക്കും
ഈച്ചകള്‍ക്കും
പൂച്ചകള്‍ക്കും
സംശയമുണ്ടായിരുന്നില്ല ..

മീന്‍
നമ്മുടെ
പ്രണയം ആയിരുന്നല്ലോ 

Tuesday, November 5, 2013

7:59 AM

ഒറ്റവരി കവിതകള്‍


ഒറ്റവരി കവിതകള്‍ 


*തീയില്‍ കൊരുത്തതൊക്കെ ആയിരുന്നു പക്ഷെ ഇളവേയിലില്‍ തന്നെ വാടിപ്പോയി 


*അന്ധകൂപത്തില്‍ അലയടിക്കുന്ന നിലവിളികള്‍

*നിന്നോര്‍മ്മയിപ്പോളോരു ഗുഹാചിത്രം

*ഞങ്ങള്‍ അവിടെ എത്തിയപ്പോള്‍ നിലാവ് ഒതുക്കത്തോടെ മാറിനിന്നു

*ഉന്നം,ഇല്ലാത്തവന്റെ കയ്യിലെ കല്ലാണ് ജീവിതം

*തിരിനാളം പറയുന്നതൊന്നും കേള്‍ക്കുന്നില്ല കാറ്റ്

7:04 AM

വിരുന്ന്

വിരുന്ന്

നിങ്ങള്‍ എന്റെ വീട്ടില്‍ 
പറയാതെ 
വിരുന്നെത്തി 
എന്ന് വിചാരിക്കുക

മറ്റൊന്നും ഉണ്ടായിരിക്കുകയില്ല

എന്നെങ്കിലും നിങ്ങള്‍
വരുമെന്ന് കരുതി
പറയാതെ പറയാതെ
ബാക്കി വന്നു
ശീതീകരിണിയില്‍
സൂക്ഷിച്ചു വച്ച
കുറെ വാക്കുകള്‍ ഒഴികെ
മധുരമഴിഞ്ഞു
സ്വാദ് കെട്ടുപോയ
ചില സ്വപ്‌നങ്ങള്‍ ഒഴികെ

തലങ്ങും വിലങ്ങും
അതിര്‍ത്തിട്ട്
മരവിച്ചു പോയ
ജീവിതം ഒഴികെ

Saturday, November 2, 2013

8:30 PM

ശൈലീ വികൃതികള്‍

ശൈലീ വികൃതികള്‍ 


വൃദ്ധ സദനങ്ങള്‍ പോലെ 
മുളച്ചു പൊന്തുന്ന കൂണുകള്‍ 

വാര്‍ത്തകള്‍ പോലെ
പരക്കുന്ന കാട്ടുതീ

പ്രണയങ്ങള്‍ പോലെ
ഉടഞ്ഞുപോകുന്ന
നീര്‍പ്പോളകള്‍

മനുഷ്യരെ പോലെ
എരിഞ്ഞടങ്ങുന്ന
ഈയാംപാറ്റകള്‍

ബന്ധങ്ങള്‍ പോലെ വലിച്ചെറിയപ്പെടുന്ന 

കറിവേപ്പിലകള്‍

മനസ്സുകള്‍ പോലെ നീറുന്ന ഉമിത്തീ
7:21 AM

ഒരുക്കങ്ങള്‍

ഒരുക്കങ്ങള്‍ 

അതിരാവിലെ 
അലാറം വച്ച് എഴുനേറ്റു 
സി ബി എസ് സി ക്കാരി മൂത്ത മോളെ 
കുലുക്കി വിളിച്ചുണര്‍ത്തി
കേരളപ്പിറവിക്കു പ്രസന്റ് ചെയ്യാനുള്ള 
സ്പീച്ച് ബൈഹാര്‍ട്ടക്കാന്‍ ഇരുത്തി 

കൂട്ടുകാര്‍ക്ക് ഹാപ്പി കേരളപ്പിറവി
എസ് എം എസ് ആശംസ
സെന്റു ചെയ്യാന്‍ ചട്ടം കെട്ടി

എല്‍ കെ ജി ക്കാരനെ
അടിച്ചുണര്‍ത്തി
കേരളപ്പിറവിക്കു എക്സിബിഷനുള്ള
ഇംഗ്ലീഷ് പോസ്റര്‍
വരപ്പിച്ചുണ്ടാക്കി

മടിയിലെ ലാപ്ടോപ്പില്‍
ഇംഗ്ലീഷ് പത്രം
വള്ളിപുള്ളി വിടാതെ
വായിക്കുന്ന
ചാരുകസാലക്ക്
ബെഡ് കോഫി കൊടുത്തു

പിന്നെ
ഇന്നുടുക്കാന്‍
സെറ്റ് മുണ്ട് അയേണ്‍ ചെയ്തു

ധൃതിയില്‍ ഉടുത്തൊരുങ്ങി
ടീച്ചര്‍ സ്കൂളിലേക്ക്
സ്കൂട്ടിയില്‍ പാഞ്ഞു

ഇന്ന് കേരളപ്പിറവിയാണ്
സ്പെഷല്‍ അസംബ്ലി ഉണ്ട്
ലേറ്റ് ആവരുതല്ലോ

ലിപ്സ്ടിക് അധികം ആയോ ആവൊ ?
മുടിയില്‍ തിരുകി വച്ച
തുളസിപ്പൂ കൊഴിഞ്ഞു പോയോ ആവോ ?
മോള് നന്നായി പ്രസന്റ് ചെയ്‌താല്‍
മതിയായിരുന്നു
മോന്റെ പോസ്ടറിന്
ഒരു ബോര്‍ഡര്‍ കൂടി ഇടാമായിരുന്നു

സ്കൂട്ടി ഇടവഴി വിട്ട്
ഹൈവേയിലേക്ക്
ഒഴുകിപ്പോയി ..