തീര്‍പ്പുകള്‍

തീര്‍പ്പുകള്‍ 

അനന്തതയിലേക്ക് നീളുന്ന 
വൈദ്യുത കമ്പികളില്‍ 
നട്ടുച്ചയ്ക്ക് 
നമുക്ക് കൊക്കുരുമ്മി 
തൂവലുകള്‍ ചിക്കി 
കണ്ണില്‍ കണ്ണില്‍ നോക്കി 
തപസ്സിരിക്കണം 

ഇടയ്ക്ക്
പ്രണയത്തിന്റെ
വേദ പുസ്തകത്തിലെ
ആരും കാണാത്ത വരികള്‍
നീ ഉറക്കെ വായിച്ചു
വിശപ്പ്‌ തീര്‍ക്കണം

ഒട്ടിയ ഹൃദയങ്ങളില്‍ നിന്നും
നമ്മുടെ ഗാനം
നമ്മളില്‍ നിന്നും നമ്മളിലേക്ക് തന്നെ
ഒഴുകിപ്പരന്നു നിറയണം

അപ്പോള്‍ പെട്ടെന്ന്
വൈദ്യതി പ്രവഹിച്ചു
നമ്മള്‍ കരിഞ്ഞു പോയ്ക്കൊള്ളട്ടെ
ഒരു കവണയില്‍
നമ്മള്‍ പിടഞ്ഞു വീഴട്ടെ ..

നമുക്കെന്തിനാണ്
മാംസത്തിന്റെ ഭാരം പേറുന്ന
രണ്ടു ശരീരങ്ങള്‍ ?