ലേലം

പൂരപ്പറമ്പാണ്
വഴിപാടു കിട്ടിയ
പശുക്കുട്ടിയുടെ '
ലേലമാണ്

തലപ്പണം
പതിനായിരം
പണം പോക്കറ്റിലിട്ട് നടന്നാൽ പോര
ചങ്കുറപ്പുള്ളവർ കയറ്റി വിളിക്കണം

മോഹക്കാരൻ അഞ്ഞൂറ് കയറ്റി വിളിച്ചു
കശാപ്പുകാരൻ ആയിരവും

വിളി മൂക്കുന്നു
കൂടിയാൽ അമ്പതു കിലോ
നഷ്ടത്തിന്റെ മനക്കണക്കിൽ
തോലു കിഴിച്ച്
കെട്ടിത്തൂക്കി
അറവുകാരൻമാറുന്നു
ഒരു ഗോശാല ആകാശക്കോട്ട കണ്ട
മോഹക്കാരന് ലേലമുറപ്പിക്കുന്നു

പശുക്കുട്ടിക്ക്
കൊമ്പുമുളക്കുന്നു
ചുര മാന്തുന്നു
അമറുന്നു
കാണക്കാണെ ആകാശം മുട്ടുന്നു

അതിനു മാത്രം അറിയാവുന്ന താളത്തിൽ
നൃത്തംചവിട്ടുന്നു

ലേലക്കാരനും
മോഹക്കാരനും
അറവുകാരനും
കാഴ്ചക്കാരും
കുളമ്പുകൾക്കിടയിൽ
ഞെരിഞ്ഞമരുമ്പോൾ

കയറുകളെല്ലാം
പിരിയുടഞ്ഞു പൊട്ടി
വഴിപാടു കാരന്റെ
കാൽച്ചുവട്ടിലേക്ക്
കാണക്കാണെ ചെറുതായി വന്ന പശുക്കുട്ടി
കാൽനക്കി തൊട്ടുരുമ്മി
അനുസരണപ്പെടുന്നു

ലേലമാണ്
പുരപ്പറമ്പാണ്
ഇങ്ങനെ പലതും നടക്കുമെന്ന
ചങ്കിടിപ്പിൽ
കൊടിക്കൂറ മാത്രം
ഇളകിയാടുന്നു

*പാലോട്*