കിൻഡർ ജോയ്

അയാൾ സിനിമ കാണുകയാണ്
അവൾ സിനിമ കാണുകയാണ്
അയാൾക്കുമവൾക്കുമൊപ്പം
ഒരു കൊച്ചു പെൺകുട്ടിയും
സിനിമ കാണുകയാണ്

പാമ്പുകളെല്ലാം
അയാളുടെ വിരലുകളാണ്
അവളെ ചുറ്റിവരിഞ്ഞ്
അഭ്രപാളിക്കുള്ളിലേക്ക്
മറ്റൊരു കഥയിലേക്ക്
കൊണ്ടുപോവുകയാണ്

കൊച്ചു കുട്ടി ഇതറിയാതെ
ഒരു ഗാനരംഗത്തിൽ
മിഴിച്ചിരിക്കുകയാണ്

വിരലുകള്‍ ഇഴഞ്ഞു വന്ന്
കുഞ്ഞിന്റെ കണ്ണുകൾ പൊത്തി
മുള്ളുകൾ മാത്രമുള്ള
താഴ്വരയിലൂടെ
വലിച്ചിഴക്കുകയാണ്

അയാളപ്പോഴും
അഭിനയിച്ചു കൊണ്ടേയിരിക്കുകയാണ്

ഇരിപ്പിടങ്ങൾ ചുട്ടുപഴുക്കുന്ന
ഇടവേളകളിൽ പോലും
കുഞ്ഞിക്കണ്ണിലെ
നക്ഷത്രത്തിളക്കം
അവർ കണ്ടില്ല
അയാൾ കണ്ടില്ല

പതിയെപ്പതിയെ
തീയറ്റർ മുഴുവൻ
വിരലുകള്‍ നിറയുകയും
സീൽക്കാരങ്ങൾ മാത്രമാവുകയും ചെയ്യുന്നുണ്ട്

വിഷം മണക്കുന്ന ഇരുട്ടിൽ
പെൺകുട്ടി മാത്രം
ഒന്നുമറിയാതെ

ലോകം മുഴുവന്‍ വിരലുകളും
പത്തികളുമാണെന്ന്
ഏതു സിനിമയാണ്
നമ്മളോട് വിളിച്ചു പറയുക??

*ശിവപ്രസാദ് പാലോട്*