കല്പ്പാന്തം

കല്പ്പാന്തം 

അങ്ങിനെയിരിക്കെയാണ് 
ഒരു സസ്യം ആവണമെന്ന് തോന്നിയത് 

ഒരു വേര് വേണം എന്ന് തോന്നി
പണയം വച്ച
പകലുകളില്‍ നിന്നും
അത് കണ്ടെത്തി

ഒരു തളിര് വേണം എന്ന് തോന്നി
അപ്പോഴാണ്‌
ആകാശം ഇറങ്ങി വന്നത്

ഒരു തണ്ടിനുള്ള മോഹം കനത്തു
സ്വപ്നം
കല്ലിച്ചു കിടന്ന ഒരു നട്ടുച്ചയാണ്
അത് കാണിച്ചു തന്നത്

ഒന്ന് പൂവിട്ടാലെന്ത്?
നിന്റെ കടക്കണ്ണില്‍
ഒരു പൂ കണ്ടു

അങ്ങിനെ വേരോടി
തളിര്‍ത്തു
തണ്ടില്‍
ഇലക്കനം വച്ച്
പൂവിട്ട്
ഒരു സസ്യമായി
ഒരു കല്ലറ വിടവില്‍

ഒരിക്കല്‍ നീയും
എന്നെപ്പോലെ
ഒരു സസ്യമാകണം
ഈ ലോകത്തോട്
അന്ന് നമുക്ക്
ഇലകളുരുമ്മി
ചിരിച്ചു നില്‍ക്കണം