കിനാപ്രാണികൾ*

കിനാപ്രാണികൾ

സ്വപ്നങ്ങൾ
കിട്ടാതായിരിക്കുന്നു,,
കരിഞ്ചന്തക്കു പോലും

കിനാക്കുടുക്കകളും
കിനാക്കുപ്പികളും വിറ്റ
കടകളെന്നേ അടഞ്ഞുപോയിരുന്നു

പേ പിടിച്ച്
സ്വപ്നജീവികൾ

വലിയ പാത്രങ്ങളിൽ
പിഴച്ചു പെറ്റ
മഴവില്ലിൻ്റെ തുണ്ടം
ഒളിച്ചുപോയ
തുമ്പിയുടെ ചിറക്
കുളിച്ചു വരുന്ന
പൂമരച്ചില്ല,
തോറ്റുപോയ
മിന്നാമിന്നികളുടെ
പ്രണയകവിതകൾ
എല്ലാമിട്ട് നുരപ്പിച്ചു

ചിലർ നട്ടുച്ചകളിൽ
ചിലരോ നട്ടപ്പാതിരക്ക്
തിളപ്പിച്ച് വാറ്റി

ജീവിതത്തിൻ്റെ വലിയൊരു
ചുടുകുളം വാറ്റിയാലാണ്
ജന്മത്തിന്റെ കനലടുപ്പ് കത്തിയാലാണ്

തെളിഞ്ഞ സ്വപ്നം കിട്ടുന്നത്,

ചൂണ്ടുവിരലിൽ പുരട്ടി
തീയ്യിൽ കാണിക്കുമ്പോൾ
കിനാനീലിമ,
വിരിഞ്ഞ കാശാവു പൂക്കൾ

ആരാനുണ്ടാക്കി വച്ച
സ്വപ്നങ്ങൾ വാങ്ങാമെന്നല്ലാതെ
കിനാക്കിണർ കുത്തുന്നതോ
കിനാക്കാടുണ്ടാക്കുന്നതോ
അശ്ലീലമായ രാജ്യത്ത്

വിസിൽ മുഴങ്ങാം
ലാത്തികൾ മുരളാം
തോക്കുകൾ പൊട്ടിച്ചിരിക്കാം
ബൂട്ടുകളിൽ ഞെരിഞ്ഞമർന്നു പോകാം
കിനാപ്രാണികൾ,,
+++++++++++++'

*ശിവപ്രസാദ് പാലോട്*